Friday, February 29, 2008

القيادة .............. و الطابوووووووووووووووووووووووور

مية مسا على كل الناس الحلوة في قهوتنا ... ازيكم يا شباب و الله لكم وحشة ... مالكم مستغربين العنوان قوي كدة ... انتو مقريتوش البرنامج الانتخابي بتاع سيادته ولا ايه؟ ... ده كان شعار الحملة اللي فلقونا بيه ليل نهار ... بتقولو ايه ؟ العنوان مكتوب غلط ... طبعا لأ بقى معقولة أغلط في أهم حاجة تضمنها برنامج سيادته ... دي الحاجة اللي حاسين بيها كلنا و شايفينها يعني سيادته وعد فأوفى و قال فصدق و أظن محدش ينكر ان الجزء ده في البرنامج تحديدا حصل و حصل و حصل و حس بيه الجميع في المدن و الريف ... بحري و قبلي مفيش فرق ... عشان كلنا مصريين و ربنا يخلي سيادته عشان يكمل البرنامج ... بتقولو ايه؟ العبور مش الطابور ... طبعا كلكم غلط عشان الغلطة كانت في اللي طبع شعارات الحملة ... اتلخبط مفهمش قصد سيادته بدل ما يكتب الطابور كتب العبور و طبعا النص أرنب بتاع الدعاية كان يا دوب على قد القد حيكفي ايه ولا ايه مانتو عارفين الصوت بكام دلوقت ... طب بذمتكم عبور ايه اللي بتتكلمو عليه ... اكيد مش سوق العبور عشان سيادته أنجزه الفترة اللي فاتت ... ولا عبور كو ت ديفوار عشان نلاعب الكاميرون في النهائي ... ايه؟عبور حرب أكتوبر ... ياااااااااااااااااااااااه انتو لسه فاكرين ... دا انتو قدام قوي من أيام الهكسوس و الجنيه الجبس و بعدين انتم مش متابعين أخبار سيادته ولا ايه ... انه مش ممكن يحط راسه ف بق الأسد و ان علاقتنا باللي ميتسموش مهمة و استراتيجية ... ولا صورة سيادته مع اولمرت و الله وش سيادته كان بدر منور ... مفيش أكتر من كدة صداقة و وئام و انسجام ... ميهمش بقى يموت لنا كام عسكري ع الحدود كل كام يوم و لا يعترفو ببجاحة بقتل الأسري في 56 و 67 ... و زي ماقال وزير خارجية سيادته مش ممكن نزعل منهم عشان شريط ...و مفيش بين الخيرين حساب و مصارين البطن بتتخانق و اذا كان السادات قائد العبور في عهده الجيش المصري عبر القناة ... سيادته مقصرش و الغاز المصري عبر الحدود مع اسرائيل حاجة ببلاش كدة ... كادوه عربون محبة ... و عقبال مية النيل ....... قال العبور قال ... الله يحظكم و الله ملعوبة ... و سمعني سلام أول ضربة جوية فتحت باب الحرية.
.الطابوووووووووووووووووووور ... أظن ده من أهم انجازات سيادته اللي وعدنا بيها و حققها فعلا محدش يقدر ينكر هذا الانجاز التاريخي لهذه القيادة التاريخية في هذا المنعطف التاريخي ... انجاز بجد وبحق و حقيقي يعني الطابور أصبح في كل قرية و مدينة في كل شارع و حارة ... فعلا سيادته مش بتاع شعارات ... القيادة و الطابور مش مجرد شعار ده عنوان المرحلة ... الطابور وصل لكل مواطن على أرض الكنانة أم الدنيا و متسألنيش مين أبوها عشان ده تبقى قلة أدب ... الطابووووووووووووووووور انجاز حقيقي قدر كل مواطن يحس بيه و يلمسه ويمسكه بايديه ... و برغم الأوجاع اللي بيسببها الطابوووووووووووووووور بس والله لذيذ ... والمواطن اتعود علية ومبقاش ممكن يستغنى عنه ... يقدر أي واحد من الحاقدين المغرضين الخونة العملاء الجبناء ولاد الكلب ينكر الانجاز ده أو يقول انه محسش بيه ...قطع لسانه من لغلوغه هوه و اللي خلفوه كمان عشان البرنامج حقيقي و جد الجد والناس شغالة و مش بتهزر و الطابور وصل لكل مكان في المخروسة - المحروسة سابقا - يعني لو مش مصدقني انزل الشارع و انت تشوف ... اخطف رجلك لأي فرن و انت تشوف اللي عمرك ما شفته طابوووووووووووور أطول من سور الصين العظيم ده حتي كتب التاريخ قالت ان المهندس الصيني لي بينج شونج استوحى فكرة السور من طابور العيش في مصر ... والله حاجة تفرح ... كل الجرايد و المجلات العالمية كتبت عن ملحمة الطابور اللي بيعيشها الشعب المصري الأيام دي ... النيوزويك التايمز الجارديان النيويورك تايمز ... الحقيقة تجربة رائدة تشارك فيها كل طوائف الشعب رجالا و نساءا شيوخا و أطفالا عمالا و فلاحين و موظفين ... تخطيط سيادته ميخرش المية خبرة عسكرية محصلتش و تنظيم دقيق مفيهوش غلطة حيث يزحف المصريون جميعا مع أول ضوء ... مع آذان الفجر جحافل تسد عين الشمس على أي فرن حتى الفرن العالي بتاع مصنع الحديد و الصلب ... و تبدأ معارك طاحنة يهون فيها كل نفيس وغالي على رأي الشاعر شاب الحديد لهولها و النار ... الكل يرفع شعار الخبز أو الشهادة و عض قلبي ولا تعض رغيفي ... بس كله يهون عشان تجيب بجنيه عيش و على رأي شوقي بك قد تهون الأرض الا مخبزا ... المصرى يتحدى الحر الهجير و البرد الزمهرير و الفساد و الاستبداد ولا يهمه موانع ولا حواجز ولا عقبات عشان خاطر يحطم المستحيل و يحقق الحلم الجميل ... بجنيه عيش ... كأنه فتح عكا و جاب الديب من ديله لا يكل و لايمل زي الثور اللي مربوط في ساقية ... ولا بيفكر ايه اللي وصلنا لكدة كنا سلة القمح لروما وامبراطوريتها و بقينا ...... ولا بلاش.
الحقيقة ملحمة الطابووووووووووووووور كشفت معدن الشعب المصري الأصيل اللي كلته البارومة و علاه الصدا ... ده ميمنعش اننا نشوف فوايد الطابووووووووور و اذا كان في السفر سبع فوايد ففي الطابور سبعبن فايدة ... يعني بداية ان المواطن يصحى مع أول ضوء عشان يلحق مكانه و بكدة نضمن انه حيتخمد من بعد العشا و ده مهم جدا لأنه ما اختلى رجل و امرأة الا و كان الشيطان ثالثهما حتي لو كانت مراته و بكدة نبقى منعنا الزيادة السكانية ... شفتو بقى حنكة سيادته و بعد نظره ...آدينا حلينا مشكلة الزيادة السكانية اللي محدش عارف يحلها ... حاجة سهلة زي شكة الدبوس ... ده غير ان الناس كلها حتصلي الفجر حاضر يعني البرنامج بتاع سيادته مش ناسي الجنة و مظبطنا دنيا و آخرة ... والله خير سيادته مغرقنا ... ده غير ان الطابور من أهم ضمانات الحفاظ على السلام الاجتماعي ... و ليه نشوفه على انه زحمة و مرمطة و بهدلة زي الناس الوحشين السوداويين ليه منشوفوش زي سيادته مؤتمر شعبي جماهيري حاشد تتعارف فيه طبقات الشعب العامل و تكون صداقات جديدة و علاقات انسانية رائعة ... كرنفال شعبي يومي يعبر عن تضامن الشعب و أظن مفيش تضامن أكتر من كدة يا جماعة ... و طبعا الطابووووور أكبر رد على بتوع الفتنة الطائفية حيث لا فرق بيت مسلم و قبطي الكل بيتبهدل و بيتمرمط و بيطلع عينه و عين اللي خلفوه عشان مصر طول عمرها طابور واحد أقصد نسيج واحد ... و سمعني سلام تبقى انت أكيد أكيد في مصر.
الطابووووور معركة ... صورها مالية الجرانين و المجلات و الفضائيات ... جحافل تسد عين الشمس مجهزة بأحدث الأسلحة من أكياس و شنط و جرايد و كراتين و أقفاص و أي شيء تحمل فيه غنائمها الثمينة من العيش ... ده حسين أفندي بيودع مراته و عياله و هوه رايح الميدان ... قصدي الأفران ... وده عم شمندي يخر ساجدا بعد خروجه ظافرا مظفرا بخمس أرغفة دون أن يصاب بخربوش ... يعني اديني عمر و ارميني في الطابووور ... روح الطابووووور خلت البلد حاجة تانية و عشان كدة مش لازم نقف قدام الخساير البسيطة اللي حصلت و بتحصل أثناء الطابوووور ... أي نعم مصر خسرت ثلاثين أربعين مواطن في الطابووور بس دي ولا حاجة قدام الملايين اللي شاركت في الطابووور ... الخبراء قالوا ان خسايرنا مش أقل من 30% لكن اللي حصل معجزة خلت العالم يقف على طراطيف صوابعه ... و مصر مش بتنسى ولادها ... وضحايا الطابووووووور الدولة حتكرمهم و حتطلق أسماءهم على الأفران اللي استشهدوا فيها و كمان حتصرف لأولادهم عيش و كمان كايزر ... الله يا مصر والله أصيلة ... و سمعني سلام المصريين أهمة حيوية و عزم و همة.
و بما اننا دولة اسلامية و الشريعة الاسلامية هي المصدر الرئيسي للتشريع سيادته كلم فضيلته اللي هبدنا فتوى انما ايه من الشمخ الجواني قال فيها ان رغيف الطابورالبلدي أجره 27 ضعف الرغيف الفينو و الكايزر و البيتي بان عشان ثواب الجماعة باعتبار ان الطابور فرض عين ده غير ان ثواب الطابور أكبر من صوم التطوع و صلاة النافلة و قيام الليل ... انفروا خفافا و ثقالا الى الطابورأيها المسلمون ... ده غير ان مولانا هدد بالويل والثبور و عظائم الأمور كل واحد يطمع يجيب عيش بأكتر من 2 جنيه باعتبار ان المعدة بيت الداء و جوعوا تصحوا يا عالم يا فجرة ... الدولة حتعملكم ايه أكتر من كدة و قال ان اللي حيعمل كدة و يخالف فتوى فضيلته مش حيورد على جنة ولا على نار ... حيفضل كدة في عذاب الطابور ... و كانت المفاجأة ان اللي مات في الطابور و هوه بيجيب بأكتر من اتنين جنيه مش شهيد ولا حاجة ... عشان هوه طماع و طفس و همه على بطنه و يستاهل اللي جراله ... مش بقولكم فضيلته حاضر في جميع قضايا الأمة و كان لازمي يرمي بجردله قصدي يدلي بدلوه ... أصلها ناقصة .
ده عن رأي فضيلته أما عن رأي معاليه ناظر وزارة ايدينا في ايدين بعض فبسم الله ماشاء الله الراجل بيخر علم و فكر و تطور ... تحفة محصلش أولا معاه حق مش معقول الناس بتنزل ع العيش زي الجراد سايبين اللحمة والفراخ و الاستاكوزا و السيمون فيميه و طالبة معاهم عيش ... شعب فقري مفيش منه رجا ... يعني لما هما تعبانين من العيش طيب ماقدامهم الكرواسون و الباتيه و الباتون ساليه حد حايشهم حد مانعهم ... بشرفي المحلات دي فاضية بتنش ... و بعدين مع معاليه حق ... بنستهلك قمح عمال على بطال ... أعلى معدل استهلاك في العالم ... طبعا ده عشان ناس كتيييييييييير فطارها و غداها و عشاها عيش حاف ... و بتستنى اللحمة من العيد للعيد ... و بتعمل شوربة على رجول الفراخ ... و برغم ان معاليه ميعرفش الناس دي و عمره ما شافهم و ميفرقوش معاه بصلة بس برضه معاليه مش ساكت ... معاليه هرش في دماغه ثم أخذ يفكر و يفكر ثم جلس يفكر و يفكر ثم وقف يفكر و يفكر و قرر اننا محتاجين فكر جديد عشان نقدر نلحقهم في بلدهم اللي بتتقدم بيهم ... و الحقيقة معاليه مسكتش فكان لابد نساير العصر و نواكب العلم و اذا كانت الحكومة نقلت روحها للقرية الذكية مش معقول تسيبنا ف جهلنا ... التكنولوبيا ثم التكنولوبيا ثم التكنولوبيا ... يعني أولا لابد من فصل الانتاج عن التوزيع و بكدة ننقل الطابور من قدام الأفران عشان يبقى قدام أكشاك التوزيع و بكدة تبقى الأفران فاضية ورايقة ... مش كدة وبس لأ كمان حنوزع العيش بالكروت الذكية ... يعني أم الخير و شلبية و عم أيوب و حسنين أفندي و الواد بلبل كل واحد حيشتري العيش بالفيزا كارت بتاعه من أي مخبز ... لأ مش كدة و بس المواطن اللي مش فاضي و معندوش وقت يشارك في الطابوووور مفيش مشكلة نو بروبلم ممكن يشتري العيش من ع النت ... يدخل الباسوورد بتاعته ... و على الهوتميل طلبه حيوصله في ساعتها و كمان سخن ملهلب ... ده هوتميل مش أي حاجة ... و لمنع أي تلاعب يا ريت كل مواطن ياخد باله من العلامة المائية اللي ع الرغيف و يراجع الباركود اللي فيه كل بيانات الرغيف من طق طق لسلامو عليكو ... يا جماعة و الله العلم نوووورن ... و سمعني سلام العمدة الآلي شرفنا يا خالي.
الحقيقة زي ماقال معاليه الطابووووووور كان تجربة رائعة و النتائج مبهرة و عشان كدة معاليه حيعممه ف كل حاجة عشان كل مواطن مصري يتمتع بالطابووووووووور أكتر و أكتر ... و خد عندك البنزين 80 ... فرص العمل ... يطلبوا عشر أفراد أمن يتقدم ربع مليون واحد ... أنابيب البوتاجاز ... أما بطاقات التموين الجديدة فبسم الله ماشاء الله ... نجاح ساحق ماحق لا يصد ولا يرد ... و عشان كدة كل الخبراء أكدوا لمعاليه في تقارير اترفعت لسيادته ان الشعب اتعود بجد ع الطابوووووور لدرجة ان الناس بتدور ع الطابووووور و تروحله برجليها حتى لو من غير سبب ... وده معناه ان البرنامج نجح جدا جدا جدا و اقترحوا على معاليه انشاء المجلس الأعلى للطابوووووور ... بحيث يكون الغرض منه تطويل الطابووووووور من أجل المواطن بحيث يضمن الجميع دخول و خروج الطابووووووور بدون أي مشاكل أو منغصات ... و وعمار يا مصر ... و سمعني سلام ... بمبي بمبي بمبي بمبي.

Saturday, October 6, 2007

دكتور على نفسك يا ..............

على من يختار ذلك أن يتحمل عواقبه مستقبلا .... تفتكروا مين يكون قال الكلام ده؟ولمين؟ويقصد بيه ايه؟لا والله مش امتحان ولا حاجة يا جماعة ادينا بندردش في القهوة ورمضان كريم والصيام ثوابه ميكملش الا لو المسلم حل فيه فوازير ده ثواب الفوازير أكبر من ثواب حاجات تانية كتير زي ما قال مولانا الشيخ الشريب و كمان مولانا سيد بيه اوكي شفتو لمانحل فوازير سوا ع القهوة ناخد ثواب الجماعة شفتو بقي ايوة كدة ركزو معايا السؤال سهل خالص بتقول ايه؟اللي قال كده بوش لعنة الله عليه في الكونجرس بيهدد بيه أبو زعبوط الخضراوي اللي مبهدل جيشه في العراق و مدوخ المارينز و البشمرجة ومطلع عينهم .... متبتسمش قوي كدة اجابة غلط يا عم متحلفش بس انك قريتها في الجرنان هوه انت بتقرا جرايد ولا عمرك مسكتها دا انت آخرك ميكي جيب ولا بكتيره الشبكة.... بتقول ايه علي صوتك يا عم متخافش وعلي رأي الغنوة طاطي طاطي طاطي طاطي انت في وطن ديمقراطي بتقول ايه؟حبيب ايه؟آه حبيب العادلي للاخوانجية وبتوع كفاية والمظاهرات لا يا عم طلعت آوت يعني مجبتش الديب من ديله أنا معاك انهم يستاهلو قطع رقبتهم بس مش هوه اللي قال كدة .... ايه يا جماعة؟مش عارفين؟الفطار كبس على نفسكم ولا ايه؟حسهلها عليكم الكلام ده حصل في مصر آه والله ف مصر .... برضه مش عارفين وعايزيني اغششكم طيب طيب انا حاقولكم مين اللي قاله .... اللي قاله رئيس الوزرا أحمد باشا نظيف تفتكرو يكون قالو لمين؟؟؟فكرو شوية .... للتجار المستغلين اللي بيرفعو الأسعار .... غلط للي احتكرو الحديد والأسمنت .... برضه غلط لكل اللي اتربحو وارتشو ونهبو كبشوا .... ده كمان غلط لكا اخوانا الأشقاء اللي نسيو نفسهم واتطاولو علي مصر وولادها .... تصدقو ضحكتوني وهوه من امتي الحكومة بيفرق معاها الكلام الفاضي ده قال احتكار واستغلال وفساد وكرامة وأبصر ايه يا جماعة انتو لسه عايشين في الخزعبلات دي الراجل قال الكلام ده فعلا واتنشر في الجرانين عارفين قاله لمين؟؟؟؟؟؟؟؟خلاص خلاص حاقولكم قاله لأوائل الثانوية العامة أصله كان بيحذرهم .... بيحذرهم من ايه بقي؟لأ مكنش بيحذرهم من المخدرات ولا الارهاب ولا حتى أصدقاء السوء طبعا أكيد احترتم وغلب حماركم وعشان كدة حاريحكم كان بيحذرهم من دخول كلية وحشة وسمعتها زي الزفت و سيرتها بقت علي كل لسان كلية بتعلم الناس شغلانة بطالة وبتعر صاحبها طبعا كلكم عرفتوها أستغفر الله العظيم مضطر انطق اسمها بس ربنا يسامحني بقي كلية الطب لعنة الله عليها انا مش عارف ازاي يسيبو مكان مشبوه زي كده يخلي الشباب اغلي حاجة عندنا ينحرف ويضيع نفسه ده كلام يا جماعة بدل الشاب ما يطلع فتوة ولا بلطجي ولا لعيب كورة وبدل ماالبنت تطلع رقاصة حاجات تشرفهم وتشرف بلدهم وبكده يرفعو اسم مصر نسيبهم يعملو ف نفسهم كدة يخشو طب والعياذ بالله و الله ده تسيب انا رأيي منكتفيش بالتحذير العيال دي مش سهلة ولو سكتنالهم حيقرفونا بقي ويقولولك كادر وفلوس وتدريب و كلام فاضي بقي هوه احنا فاضيينلهم ولا فاضيينلهم البلد فيها حاجات أهم بكتير قال دكاترة قال والله انا مش عارف ازاي بننام وهما وسطينا احنا لازم نستاصل الفئة دي من جذورها يعني نجفف منابع الطب ونقفل كلياتهم وبكدة مش حيبقي فيه جديد منهم أما القدام فدول أمرهم سهل وبكدة في خلال 5 سنين نكون خلصنا البلد منهم ومن شرهم .... وعاى رأي عادل امام البلد مش عايزة دكاترة ومهندسين البلد عايزة صيع آه والله صيع .... حسبي الله ونعم الوكيل فيكم كلكم ياللي خربتو البلد وجبتوها الأرض.
بذمتكم ده كلام يقوله حد محترم ف بلد بتحترم شبابها وبتقدر العلم اللي هوه طبعا لا يكيل بالبتنجان يعني شباب طلع عينه وعين اللي خلفوه دروس وفلوس ومذاكرة ومجهود وقلق وسهر وربنا كرمه تحبو يدرس ايه بعد كدة؟والله العيال دي هي اللي غلطانة كان قدامها طريق الفشل سهل ولذيذ بلا علم بلا قرف كان قدامهم يخشو سيكلام ولا يكتفو بدبلون ولا يخلصو التوجيهية ويدورو علي اي شغلانة تخلي الشاب من دول كسيب يعني يتعلمله صنعة وربنا يكرمه مفيهاش حاجة أبدا انما ينحرف ويتحدانا ويخش طب والعياذ بالله يبقي يستاهل اللي يجراله ذنبه علي جنبه واللي يلعب دح ميقلش .... أه ولا هما فاكرينها سايبة ومصدقين ان احنا بجد ناويين نلحق العالم اللي برة اللي سبقتنا بييجي 300 سنة بس احنا بنشخر من 7000 سنة ومش ناويين نصحي يعني مش عايزين ازعاج والمرحلة دي مش بتاعة طب وكلام فاضي من ده احب ابشركم اننا ضايعين ضايعين ضايعين لا محالة لأن العبور للمستقبل محتاج صيع وبلطجية وحرامية ومنافقين ومطبلاتية وقدامك تفيد بلدك في أي مجال من دول احنا معدناش محتاجين لا لعلما ولا اطبا ولا دكاترة ولا مهندسين ولا بتوع ذرة الناس دي سوقها نايم هنا لدرجة اننا بنسربهم زي القطط ف اي مكان امريكا كندا استراليا اهو نخلص منهم بدل ما هما واقفين علينا بخسارة اكل ومرعى وقلة صنعة .... وتخيل نفسك طالب متفوق وبتتكرم من أكبر مسئول في حكومة بلدك ولقيته بيقولك الكلام الأهبل ده تفتكر يكون احساسك ايه؟تبقي لسه حتبدأمستقبلك وبتحلم تبقي دكتور ولا مهندس ولا عالم ذرة تلاقي البلد بتقولك معلش شطبنا كان زمان وجبر يا خويا معدش يلزمنا أظن احساس قاتل ان كله عند العرب صابون واحمد زي الحاج احمد وبكالوريوس الطب ميفرقش حاجة عن شهادة نحو الأمية ولا دبلومة الهشك بشك من معهد مدام سوسكا اش اش يبقى ليه تتعب أكتر لما ممكن أقل يبقى تاخدها من قصيرها عقلك ف راسك تعرف خلاصك وطول ما ندي ضهرنا للترعة عمر البلهارسيا ف جتتنا ما ترعى انفد بجلدك بقي واتعظ من اللي قبلك ولو مسمعتش الكلام يبقى انت اللي جبته لنفسك.
طبعا الحكومة مش بتهوش ولقد أعذر من أنذر والناس مش ناوية ترحم دكتور أو تعتق دكتورة من أعمالهم سلط عليهم و خد عندك الغاء تكليف الأطباء يعني حناخد 3500 واحد بس والباقي في الشارع ميلزموناش حوالي 10000 دكتور زيادة معملناش حسابنا عليهم والله يا جماعة مفيش سفه كدة بلد تعلم 10000 دكتور وبعد ما تخرجهم تقولهم سوري مفيش مكان شوفولكم شغلانة تانية و فيها ايه يعني لما تشتغل سباك ولا ميكانيكي وانت معاك بكالوريوس طب أو تفتح مشروع صغنن على قدك كشك سجاير ولا تسرح بكازوزة العمل شرف ومفيهاش حاجة لما تذاكر زولوجي وفسيولوجي وفارما كولوجي وباثولوجي وهستولوجي و تمقق عينك في الباطنة والجراحة والنسا والأطفال وتطلع سواق تاكسي ولا سمسار ولا منادي سيارات وبعدين الحكومة مش قادرة تسد مرتبات الدكاترة اللي بالعين ميزانية البلد ف كرشهم الواحد يتخرج من هنا ويحط رجل على رجل يلهف كل شهر 250 أهيف لحلوح ينطح لحلوح ليه هوه كان بيعمل ايه يعني عشان ياخد كل الفلوس دي ايه يعني طلعت روحه 7 سنين مشافش فيهم مية ولا نور لحد ما خد شهادته ده مش مبرر اننا نديله الفلوس دي كلها لأ ده يا خد بال... القديمة عشان يبقى عبرة لمن يعتبر.
طبعا أكيد محدش ممكن يتخيل احنا تعبنا ازاي في الكلية دي لأ ولحد دلوقت مشفناش راحة يعني طلعت روحنا 7 سنين نسينا حاجة اسمها صيف يعني اول 3 سنين كنا بناخد شهر واحد أجازة اما في البكالوريوس فالسنة الدراسية كانت 13 شهر آه والله 13 شهر يعني حتي أطول من سنة السجن اللي هي 9 شهور بس كنا نخلص آخر ناس وندخل أول ناس أما السنة نفسها فكانت طويلة جدا وكل يومين امتحانات ايشي عملي ونظري وشفوي و كلينيكال وكله كوم والشفوي كوم تاني آهي الورقة مدارية انشالله تكتب ريان يا فجل ربك حليم ستار انما الأورال بقي مصيبة سودة يعني تتهزأوتتبعتر كرامتك كدة عيني عينك وفضيحتك تبقى بجلاجل قدام الدفعة والمعيدين والعيانين ده غير انك مضطر تلبس بدلة وجرافتة في عز حر الصيف لأن مينفعش برستيجك ميسمحش وانت عارف اننا بلد مظاهر وعلى رأي ستي وستك يا شايف الجدع وتزويقه يا تري هوه فطر ولا علي ريقه والله كان في يوم في شفوي الجراحة عندنا 9 لجان ولو مكنتش جربت احساس الهدوم في الغسالة الأتوماتيك أنا ممكن اوصفهولك مرحلة مرحلة شطف ع البارد والسخن و عصر وتجفيف وكمان كوي يعني غسيل و مكوة بقولك 9 لجان في ساعتين زمن .... وكله كوم والكتب كوم تاني يعني لو حبيت تجيب ميكي جيب في الباطنة ولا سمير في الجراحة حتكع وحتكع كتير وبلاش اقولك بقي ع المراجع اللي حتحتاجها عشان تكمل الماستر والله مش حتصدق أسعارها ده غير انك بتخلص بس من غير ما تخلص يعني أي حد تاني يوم ماياخد شهادته علاقته بالدراسة والمذاكرة تنتهي الا انت تفضل تلموذ طول حياتك وتخلص بكالوريوس تحفى عشان تسجل ماجستير وتصرف وتتعب وتدفع دم قلبك و تعمل خدك مداس و ياريت عاجب ومطلوب انك تاخد 300 ولا 400 جنيه في الشهر تدفع منهم مصاريف دراستك وتشتري المراجع اللي حتتنيل تذاكر منها وتاكل وتشرب وكمان تحوش عشان تتجوز وتفتح بيت ولو في حد عنده حل للفزورة دي يا ريت يقوللي وله ثواب كبير عند ربنا طبعا الواحد يضطر يعوض المليمين دول بالشغل التاني وتفضل تتنطط من مستوصف لمستشفى عشان تلم من هنا شلن ومن هنا بريزة عشان تقدر تعيش يا دوب تقدر تعيش وطبعا كل ده على حساب صحتك ومستواك العلمي لأن مفيش وقت تنام ولا ترتاح وطبعا مفيش دماغ انك تبص ف ورقة ولا تفتح كتاب تطلع من نايت شيفت لمورنينج لزيارة منزلية للعيادة ام كشفين وتخيل تبات برة بيتك عشان 20 جنيه آه والله مش بهزر يعني طور مربوط في ساقية ومطلوب منك تلبس وتاكل بشكل معين يليق بمقام جنابك متنساش انك زفت دكتور وفالحين يقولولك بس استغلال الأطبا و الطب رسالة ومهنة مقدسة و شرف المهنة اللي هوه زي عود الكبريت ميولعش غير مرة واحدة بس و يقعدو يعملو برامج عن أخطاء الأطبا و رفع مستواهم والتطوير والتحسين والكلام الكبير اللي انتم عارفين وانا بس احب اسأل تحسين ايه وزفت ايه في بلد ميزانية وزارة الصحة اللي هي مع التعليم يعتبرو أهم وزارتين حوالي 10 مليار واقسم دول على 75 مليون وشوف نصيبك كام ولو جابلك شريط أسبرين تعالى تف ف وشي يا عم بلاش خيبة بلد بتصرف على أهم قطاع فتافيت مستنية تكون النتيجة ايه؟الحكاية مش لغز ولا احنا حنخترع العجلة اللي اخترعوها من مليون سنة و مادام انتم عارفين ان ده قطاع حساس ومسئول عن أرواح الناس بتعملو فيه كده ليه؟مطلوب اننا منقصرش ونذاكر ونطلع علي الجديد و نتعرض لكل البلاوي اللي في الدنيا فيروس سي ايدز التهاب سحائي وغيره وغيره وغيره وتفتكرو بناخد بدل عدوى كام؟ستة جنيه في الشهر والله مايجيبو حتى قطن وشاش عايز تحسن القطاع ده اصرف حسن أجور الناس اللي طافحة الدم و وفر لهم ظروف آدمية وبعدين تعالى حاسبهم مش ترميلهم حسنتهم آخر كل شهر 200 ولا 300 جنيه وبعدين تسأل زي الأهبل هي الناس دي بتزوغ ليه ومقصرة ليه وكارهة عيشتها ليه؟ليه يا أخي اتعميت مبتشوفش؟مسألتش نفسك ليه تلات ارباعهم هجوا وطفشو من مصر اللي له سكة لبلاد البني آدمين في أمريكا وكندا مبيفكرش بياخد ديله ف سنانه وعلى هناك طوالي واللي مالوش مضطر يستحمل البهدلةوالمرمطةوقلة القيمة في بلاد البترول غصب عنه مش أحسن ما يشحت على عيلته في مصر والله انا فاكر أخويا وحبيبي ودفعتي شريف ربنا يكرمه أصله ف أمريكا من 3 سنين لقى القضية مش جايبة همها خسرانة خسرانة مكدبش خبر وماله الديليفري والبنزين وغسيل الصحون مادام بيجيب تمنه المهم من اربع سنين أيام ما كانو بيقفشوا في المسلمين هناك ويحققوا معاهم جت الطوبة فب المعطوبة وشدوه وهناك الضابط بيقوله يعني دكتور ومتعلم يسيب بلده وييجي يشتغل في مطعم مش غريبة دي هوه انتو بتاخدو كام في مصر شريف جاوبه بكل شموخ وشمم 200 جنيه مصري تونتي هاندردز باوند باوند ينطح باوند الراجل سأل يعني كام دولار الواد جاوب برضه بنفس الشموخ والشمم أقل من 40 دولار وهنا وخد بالك من السؤال ده الضابط سأله 40 دولار في الايه؟؟؟؟؟ايوة في الايه؟؟؟؟؟؟؟الراجل متخيلش انهم في الشهر طبعا بس لما عرف صعب عليه شريف قوي وكان هاين عليه ياخده ف حضنه ويتبناه .... يا جماعة اللي بيحصل لينا ده قمة التهريج و ميرضيش أي حد عايز البلد دي تيجي قدام.
ساعات بسأل نفسي هي البلد دي بتعمل فينا كده ليه؟لدرجة ان دولة معالي الباشا رئيس الوزرا يقول كلام زي ده؟ليه الموقف ده؟يعني لاحنا بتوع مظاهرات ولا اعتصامات ولا عمرنا وقفنا قدام الحكومة ف حاجة؟يا جماعة حد يفهنا ايه العبارة ايه بالضبط؟يكونش الكلام اللي سمعته بجد؟اننا أخطر ناس ع الحكومة وزي اللقمة واقفينلها ف الزور؟طبعا الحكومة قررت تريح الشعب المصري من كل مشاكله من الدنيا وبلاويها ومش مقصرين يا جماعة والله خطط طويلة الأجل هرمونات ومبيدات مسرطنة وسحابة سودة ومية مجاري وأكوام زبالة والنتايج مبهرة وفوق المستهدف فشل كلوي زي الرز وسرطانات أشكال و ألوان والمركز الأول في العالم في فيروس سي وتليف الكبد ده غير الفكة بقي أنيمياوسوء تغذية و اكتئاب والله الناس مش ساكتين وطبعا علبال ما الخطط دي تحقق أهدافها في وزارات تانية عاملة خطط قصيرة الأجل عشان تخفف العبء عن الحكومة وخد عندك عبارات غرقانة وقطارات محروقة ناس تدخل الأقسام علي رجليها تطلع ع النقالة وطبعا احنا واحنا بس اللي عمالين نجهض أهداف الحكومة ونبوز خططها ونقاوم بجد مش بالهتافات الحنجورية ناس بتحاول تشتغل بجد وتخفف آلام الناس الغلابة وتنقذ ما يمكن انقاذه وبكدة الحكومة مش حتقدر تعبر للمستقبل طول ما هي شايلة 75 مليون على دماغها ومن هنا قررت الحكومة تتخلص مننا وتبهدلنا وتورينا النجوم ف عز الظهر لحد ما نقول حقنا برقبتنا واللي يهج يهج واللي يطفش يطفش واللي يبطل طب و بكدة نريح ونستريح.
أنا عارف اني طولت عليكم جامد بس ده من غلبي ويا قلبي يا كتاكت ياما انت مليان و ساكت و ع العموم الكلام ممنوش عازة يعني أنا عرف اننا بنأذن في مالطة وعلى رأي سعد باشا مفيش فايدة لكن ملحوقة اللي الواحد مقدرش يحققه يشوفه ف أولاده يعني يجيب واد يطلعه لعيب كورة ولا بلطجي ولا حتى مطرب حمبولي أما البنات فرزقهم واسع تبقى موديل ولا ممثلة ولا حتى رقاصة والعيلة كلها تاكل بغاشة من وراها بلا علم بلا طب بلا قلبة دماغ والله لو شفت واحد فيهم بيذاكر ولا بيفتح كتاب ليكون نهاره أسود حاخرب بيته ومش حاسمحله يكرر غلطة أبوه عشان يقدر يعبر للمستقبل اللي مالوش أي معالم .... أما أنا فمش حاسكت على نفسي أكتر من كدة حاتوب عشان ربنا يتوب علينا في الأيام المفترجة دي و اللي يقوللي يا دكتور حقوله آهو انت اللي دكتور وستين دكتور وربنا يغفر لنا بقي .... ربنا لا تؤاخذنا بما فعل السفهاء منا ولا تسلط علينا بذنوبنا من لا يخافك ولا يرحمنا .... يا رب استر ع البلد دي من اللي بيتعمل فيها .... رمضان كريم كل سنة وانتم طيبين و اشوفكم على خير.

Tuesday, September 11, 2007

قهوة متاتيا

قبل ما ترفع حواجبك وتستغرب الاسم قوي كدة وتقول ايه الاسم الثقيل ده أو تخبط كف على كف وتقول ايه الدماغ العالية دي اسم مفتكس بصحيح أحب اقولك ان قهوة متاتيا حاجة تانية خالص غير اللي في بالك يعني مش حمية وتفاحة وشاي فتلة ودومينو وطاولة زي ما سيادتك فاهم وكمان وده الأغرب الاسم مش افتكاسة ولا اختراع لأن في قهوة في مصر اسمها كدة بتقول ايه متعرفهاش ومقعدتش عليها قبل كدة انت والمقاطيع اللي معاك مع انكم مسيبتوش آه نسيت اقولك دي كانت موجودة من 200 سنة كدة أيام أفندينا الخديوي اسماعيل وطبعا دي مش أي قهوة دي قهوة كان بيقعد عليها أنظف ناس في مصر الشيخ جمال الدين الأفغاني والشيخ محمد عبده وسعد زغلول و عبد الله النديم وغيرهم كتير من الناس اللي أكيد سمعت عنهم في التاريخ أو التربية الوطنية أو حتي قريت اسمهم علي شارع أو ميدان أو مدرسة مانا عارف والقهوة دي ارتبطت بالذات بجمال الدين الأفغاني طبعا أنا عارف ان معلوماتك عن أفغانستان جامدة موت انها بلد الأفيون الأفغاني والملا عمر وطالبان بس احب انك تعرف ان جمال الدين الأفغاني ده كان مفكر عظيم وكاتب رائع وكان من أوائل العقول اللي فتحت للشرق طاقة نور بعد العثمانيين ما كانوا قلبوها ضلمة و جابوا درف العالم الاسلامي 3 قرون بحالهم وهوه اللي نور عقول جيل كامل من بعده محمد عبده وقاسم أمين و سعد زغلول وعبد الله النديم و كتب عنه عمنا الكبير قوي أحمد بهاء الدين "كان جمال الين الأفغاني يجلس في قهوة متاتيا ليوزع النشوق بيمناه ويوزع الثورة بيسراه"و اللي ميعرفش مين بهاء الدين نقوله انه من انضف الناس اللي مسكت قلم في مصر قبل مايظهر في صحافتنا اللي بينونو واللي بيهوهو واللي بيغني حاللو يا حاللو واللي تخبطله ع المكتب يتحزم ويرقص المهم نرجع لموضوعنا جمال الدين الأفغاني مات منفي في الآستانة في ظروف غامضة لأ مترماش من البلكونة زي سعاد حسني يا خفيف الفاتحة علي روحه وعلي أرواحهم جميعا كانوا فعلا رجالة.
آديك عرفت بقي قهوة متاتيا وطبعا قهوة زي دي مينفعش نتكلم فيها عن كركر ولا عن حسني عبدربه حيلعب فين السنة دي انشالله حتي يلعب في مناخيره أكيد مصر فيها حاجات أهم بكتير من كل العك ده بذمتك راضي عن نفسك وعن وضعك وعن الحالة المنيلة بستين نيلة اللي وصلنالها بتفكر في ايه؟أكيد لأ طب مستني ايه ماتيجي عندها قهوتنا فاتحة 24 ساعة لكل الناس والقعدة عندنا مش بالمشاريب ومفيش مينيمم يعني ببلاش يا معلم بس حسك عينك تقعد ساكت مادام جيت يبقي تتكلم يعني اللي حيتكلم يقعد واللي مينطقش يمشي وكل سنة وانتم طيبين ورمضان كريم.